2017年2月18日 星期六

令人痛心的判刑

早兩日,7警案已經作出裁決,7名警務人員全被判罪成,入獄兩年。評論之前,先表達自己既立場,我係偏藍既,但唔係深藍,唔會盲撐政府及建制,對於咁多年輕人係黃絲,主要源於社會既不公同睇唔到咩前景,所以我亦都明白同理解,唔一定非藍就一定錯。每件事都要睇多d,唔好因為自己既立場就完全抗拒對方既睇法,不過好可惜,香港既社會對立已成,要互相理解似乎只有極小部份人會做。

此案判決之前,立場問題,我不唯言希望佢地打甩,但結果罪成,亦不意外,但判刑一出,我真係痛心之極。o係呢個荒謬絕倫既社會,危駕醉駕撞死人都係坐3幾年,南亞推跌食環致死受1年,大專生帶大量煙霧彈企圖制造混亂隨時引致嚴重傷亡後果都係3個月,扔磚襲警就社會服務令,反而執法者就判兩年,真係唔知神聖既法官點判刑。
打人係唔正確,但我絕對理解佢地點解咁做,重記得當時警察受左幾大壓力同屈辱,印象最深係竟然送食物都要俾佔中者,而事發當日曾建超向警察潑尿液,所以拉佢既時候心入面重有做警察熱誠既有想將所受既屈辱還返俾佢都無可厚非,只不過7警走左歪路。而黃絲話佢地上庭唔認罪,係罪加一等,從來認唔認係被告既權利,不過唔認既話就等於罪成放棄減刑既機會,而之前曾建超上庭亦都唔認但亦罪成,當然黃絲亦當無事發生。而既然7警錯左就係錯左,亦已判罪成,我亦無意再辯護,而判刑係少不免,只不過神聖大偉官竟然重判兩年,真係令人好震驚,當然什麼知法犯法,什麼影響警隊聲譽,什麼什麼大把理據,但當唔少案d官都亂咁判,有d就官官相維輕判,連一條命都係有限判刑時,兩年既刑期兼唔准保釋明顯過重,司法界成日話司法獨立,實際無皇管既情況真係太過,法官只不過係平凡人,受情感立場所影響,完全唔受外界左右只係空談,適當既監管係必需,否則情況只會失控。犯錯判罪,係倡顯法治,但失衡判刑,亦只會令人失去對法律既信心。

2017年2月8日 星期三

1/17 現金流


1/17
現金流入: 47338.75
現金流出: 54802.16
月現金流: -7463

一月現金流入多左,原因係公司傳統過年前會預支多少少人工,約1/4月既月薪,另外外父贊助左部分新屋電器大約九千,所以比平時多d。

流出方面,日常開支維持平時既水平,但現金流出大增一黎因為過年用左幾千蚊封利是同買賀利,新屋支出又幾千,之後再用五千幾蚊買左黎緊3月去東京既機票,同埋交稅,結果一月又負
 成七千五蚊。

預期負現金流情況會延續落去,一黎新屋尾數未找,而且入伙後重有唔少野要買,二黎旅行重未訂酒店同未計到時既洗費。唯有寄望年中後現金流情況會有好轉。


2017年1月29日 星期日

新年快樂+年三十購物日

話咁快又一年,先祝大家新年快樂,財源滾滾。

話晒過年,點都要著下新衫既,於是趁年三十得閒d,同老婆出去行下街。過年前行街有樣好,就係唔少鋪頭都做特價,結果自己買左對Tiger波鞋,都係五舊幾,跟住買左兩條牛仔褲同一件衫,又係八舊幾水。再加埋老婆買既野,成日總共買左三千蚊鬆d。既然要洗錢,梗係要睇下簽邊張卡最著數啦!之前新屋買電器,已經食晒新卡既迎新,所以今次只能夠由回贈著手,而最著數既就係安信張新卡,至3月推廣期每簽滿四舊水可以抽一次獎,最少有廿蚊優惠券,最正係可以當免簽賬額咁用,結果o固日抽左三次,分別有百五蚊,四十蚊同廿蚊既e-coupons,共二百一蚊,本來之後重有簽諗住再抽,但原來一日只係得三次,不過計返整日既消費都有成6%回贈,比平時儲積分著數唔少,能夠善用信用卡消費可以減低出血量,唔怪得有唔少信用卡達人啦!

是次消費,其實都睇到做零售業既難處,簡單咁講,自己做o靚仔既時候買對波鞋都係幾舊,十幾年後買對波難又係幾舊,但租金人工都已經貴左唔少,而且依家網上購物又盛行,競爭更大,要賺錢真係無以前咁簡單。但唔代表實睇零售無生存空間既,起碼著上身既有時睇落好睇,但著上身好唔好要試過先知,而且行街可以當成一種娛樂,消遣既一種,咁一定有佢既生存空間感,只不過定位方面就要做得好d。

新一年希望自己都事事順利,身體健康,不求賺大錢,只求贏返d娛樂洗貴就已經唔錯啦!




2017年1月19日 星期四

檢討2016

16年既投資,算係做得唔錯,其實對我黎講,唔洗蝕已經係唔錯架啦!

雖然話就話做得ok,但亦都有檢討既空間,當中有兩大問題,第一係無把握買股既時機,第二係修維唔夠,比大圍氣氛影響到。16年頭,股市跌唔少,當時手頭上有唔少資金,但猶豫不決,只係入左少量貨,就算錯過左16年呢個最低位,o係之後既時間心水既股票都維持係一個較低既水平,但自己又嫌股價無之前咁低一直無入,結果錯過左後來既升幅。到年尾見隻股越升越多,大市氣氛又好似好返好多,被影響下入左少少貨,結果新入既賬面蝕緊6%多d。黎緊17年股市唔知會唔會大上大落,希望入市既時間能夠把握得好d,而買股都有一段時間,希望受能再提升自己既心理水平,唔好咁易受大圍氣氛動搖。

另外,今年沽期權係正回報兼唔洗接貨,但收益唔多,自己今年年初收左幾次權金但數目唔多,當時行駛價比股價低唔少,下次不妨沽多少少,睇下可唔可以唔接貨情況下收多d權金,就算接都要係一個較平既水平入貨。

檢討就檢討過,不過係咪真係會有進步,其實好大程度係睇下今年運氣如何,好彩既明明做錯都有好結果,唔好彩做咩都係錯,所以都係睇彩數啦!

2017年1月7日 星期六

16年現金流



2016年
現金流入: 七十二萬多d
現金流出: 一百萬多dd
年現金流: 負廿七萬幾

現金流入方面,最大份係人工,已扣強迫金有三十八萬左右。其次係投資回報加股息收益,有廿七萬多d。之後係五萬蚊既借貸。

現金流出方面,最大份係買股用左近三十萬。其次係借貸供款,廿萬多dd。跟住就係新屋既支出十五萬幾。

年現金流負廿七萬幾,的確唔少,但某程度上,呢廿幾萬只係買股支出,跟據返以往既投資紀錄,第時好大機會都收得返既。而且新屋既支出唔係年年有,應該係呢兩年先會有,之後就唔會再有咁大份既額外支出,所以正常既話,希望不久將來現金流可以收支平衡。

今年係第一年以現金流作結,黎緊會繼續累積落去,累積既現金流為負數越耐,就代表投資方面越無效率,不過由於呢個現金流係計埋日常開支,有可能洗大左/洗少左而未能完全反映到投資方面既效率。

2017年1月4日 星期三

12月現金流

十二月現金流狀況
現金流入: 34078.75
現金流出: 337382.8
月現金流: -303304.03

今個月現金流入有三萬四多dd,包括三萬二蚊多少少既人工同六舊水左右既權金,再加千鬆d既其他收益。但現金流出實在太勁,成三十三萬幾,現金流入遠遠唔夠cover。雖然睇落血流不止,但當中有近廿二萬係買股既支出,七萬八蚊新屋裝修同買家電,所以實際開支只係近四萬一左右,但已包含聖誕既額外支出,食餐好既同買聖誕禮物,另外亦計埋老婆揼左幾次骨成三千銀,所以只算血流成河姐,都唔係無限出血,恆常開支都係負三千蚊現金流左右。不過有d錢係要洗既,節日洗多少少真係少不免,而揼骨鬆一鬆亦都ok,因為自己頸背一直覺得麻麻地,之前試過其他揼骨效果一般,難得今次搵到間揼得唔錯,師傅幫我做完頸背真係好左好多,老婆又話想通淋巴,就幫襯得完少少。錢就辛苦黎,如果唔適當洗下又點對得住自己。

2016年12月29日 星期四

16年小總結

話咁快又一年,過埋聽日16年又過去,真係感受到咩叫光陰似箭,呢個moment,又係時候為16年既投資做個小總結。

股票收入(已賣出): +212785
全部都係賣龍翔賺返黎既。

股息收入: +61062
少過上年因為套現左唔少股票同埋d股派少左息。

期權收入: -8069
沽期權就順利收權金唔洗接貨,但補唔返買期權所輸既。

互助社利息: +387
之前一直無乜擺錢落去所以利息咁少,黎緊擺返多d下年個數會好睇dd。

年度回報: +266165

股票賬面回報(仍持有): 約+414000
主要龍翔比買入價仍有相當升幅,另兩隻只係賬面賺約萬五蚊同九千蚊,無乜料黎。


暫時除左股票,就無其他投資,其餘就係現金。整體黎計,今年回報都ok,最緊要正數唔洗蝕,下篇先再回顧一下今年既投資。