2017年5月20日 星期六

再讓古董閃卡

80後既男仔,大多都會玩閃卡,自己細個既時候都有玩,不過無乜錢,永遠儲唔齊一套,而當時唔同動漫都有出閃卡,自己o係有限銀彈入面樣樣都抽下,結果儲得好雜下。繼上次成功交收左部份龍珠閃卡,今日又約左另一位師兄交收。

今次出讓既,係bb戰士既閃卡,亦都係我第一次上網放讓,早一個禮拜已經傾好,只不過要就時間先今日交收,而早兩日交收龍珠閃卡已經係第二次放讓。相比係龍珠既閃卡,應該冷門少少,不過細個有玩bb戰士,所以又有抽下佢既閃卡。呢批閃卡,大幾廿張,雖然有入卡簿,但部份保存得唔多好,放上網平平地賣230蚊,本來都無諗住有人要,或者會俾人壓價,點知一陣間已經有兩個人話要,當然排先者得,再映相將卡既缺陷話俾排第一既師兄知,佢亦同樣接納,就佢星期六而佢就我地點交收。而傾好之後,竟然俾我o係卡簿入面搵到多張bb戰士既卡,俾另外既卡遮住,重保養得唔錯,見佢係有愛之士,今日再俾埋佢好好收藏。

能夠搵到有愛人士接收呢d閃卡,比我收o係櫃更有意思,而呢230蚊,轉個頭已經買左隻二手巴斯玩具lu。

部份卡片

2017年5月18日 星期四

出讓龍珠萬變卡

之前將個blog既標題由言投資轉左做胡言亂語的確做得岩,因為呢篇文章又係同投資無關。

話說早排搬左屋,有左自己既地方,於是開始收集返想要好耐既聖鬥士模型公仔,起初只係去玩具鋪搵,但因為有d已經出左一段時間,有d想要既款都唔易搵,而且又分日版港版,日版又借機賣貴d,我呢d精明消費者梗係唔高追啦! 結果都俾我搵到幾隻值得入手既。之後o係facebook加入左d玩具群組,不過有人放一/二手玩具出黎,俾我搵到隻二手聖矢,呢排又搵到全新既雅典娜同紫龍,價錢又合理,相當滿足。

呢輪上網搜尋玩具期間,忽然醒起自己櫃入面有d細個儲落既萬變卡。萬變卡即係閃卡,我諗80後既男生唔少都有玩過,點解叫萬變卡真係唔記得,或者因為佢閃閃下卦,由於細個無乜錢,只係間中抽下,所以永遠儲唔齊一套,而儲落唔算多既閃卡,好有價值又唔係,但因情誼結扔左佢又唔捨得,於是上呢個買賣二手玩具既群組睇下有無人要,錢唔係重點,有愛人士肯收留就得,反正d卡已經有相當歷史,而且細個都唔識點好好保存,雖然有入卡簿,部份都重keep得可以,但唔少亦頗殘舊,根本唔諗住賺錢,結果真係有有愛之士聯絡我,今日重交收左部份閃卡,本來佢只要三張,結果揀揀下有揀多幾張,少少地收兩舊水,或者可以收貴d,但個人唔覺得有需要咁做,佢搵到心頭好時我d卡又有好歸宿,大家開心就ok,而最開心係溝通交收同見到面時傾開以前玩卡既情況,咁樣話當年真係感到時光飛逝。

而今日除左約左人交收閃卡之外,亦約人交收埋我隻全新紫龍,呢兩舊水同幫補下我買紫龍既開支啦!
其中六張

2017年5月16日 星期二

轉blog標題

今日決定將個blog既標題,由言投資轉為胡言亂語。自己以為打呢個blog,係想寫下自己投資既野,但最近越黎越覺得,自己根本無資格學人講投資,投資五花八門,但自己就淨係會買下股票,而就算投資股票,都可以有無數方法,而自己就黎黎去去都係咁上下咁操作,當然自己既blog,想講咩咪講咩,洗鬼理咩資格,但自己最近什少打關於投資既文章,反而無聊逸事買下玩具既文章重多d,黎緊似乎都係咁既方向,既然係咁,就改埋個blog標題,免得有人誤入之後只睇到一大堆無聊野而浪費時間。

2017年5月10日 星期三

二手天馬神聖衣入手


上個月開始買隻第一隻聖鬥士之後,行過玩具鋪都會不時留意之前買左o固幾隻,都行全新港版,不過因為有d款已經出左一段時間,要搵新既都唔容易,搵到可能都唔平,同d玩開玩具既同事傾開,話說fb唔少群組會有一二手玩具放,既然自己買玩具既心態都係會拆出黎玩,如果隻玩具唔太殘玩下二手都可以接受,結果上星期俾我搵到隻二手神聖衣星矢,開價450,最尾430成交,第一次買二手玩具,過程順利,隻聖矢都算keep得ok,係膊頭個盔甲差dd,不過以呢個價錢都算滿意,黎緊會再物色下,睇下會唔會再搵到d平靚正既二手玩具。

2017年5月7日 星期日

04/2017 現金流



04/2017
現金流入: 28096
現金流出: 45177
月現金流: -17080

今個月現金流入得人工收入同埋dd信用卡回贈,大約兩萬七千幾蚊。工資少過平時幾千,唔係俾人減左人工,只不過係公司過年前預支左部份人工,係時候還姐。

現金流出近四萬五蚊,比預想既多唔少。最大支出依然係借貸還款,成17396蚊,比上個月多1072蚊,原因係二月做既貸款開始要還款。而除左日常洗費外,4月額外都用左唔少錢,買玩具洗左近二千六蚊,新屋買風筒風扇熨斗濾水器四季被又洗四千銀,重有之前去日本簽左四千五蚊既卡數,另外重有一次性既另類支出大約三千蚊。

4月現金流雖然比上個月少六千銀,但都負成萬七蚊,上個月重預期出血量由深紅轉為淺紅,結果都失預算,黎緊5月應該會做得好少少,真係可以變返淺血啦!

2017年4月25日 星期二

又再敗家



最近搬左去新屋,比之前方便左唔少,樓下就有個唔細既商場,一落去就有野買,不過亦因為太方便,洗錢亦容易左。

話說早兩日放假,落樓下食完個tea見無乜野做就o係商場行下,而商場入面有間唔細既玩具文具鋪,咪又入去兜個圈,而早兩個星期先o係呢度入左我第一隻聖鬥士。o係鋪頭入面左睇右睇,唔少玩具都好鍾意,本來同自己講過間中先買一隻兩隻聖鬥士獎勵下自己,點知越睇越想買,最尾梗係按捺不住,連入三隻,盛為1434大洋。之後o係d玩具fb群組傾開,入手價唔算平,某d地方好似會平少少,不過當時當刻想買都無計啦!好在間鋪可以簽卡,之前提個有某張卡每簽滿4舊可以抽獎有回贈,今次買呢3隻每隻4舊幾,我就分3次簽,最尾抽到45/45/25蚊,共回贈115蚊,咁又唔算買貴好多。

今次無啦啦買左幾隻,都要抖返下,等下個月出左糧reload返d子彈先可以再買lu。


2017年4月23日 星期日

百幻強迫金

強迫金應該係打工仔最唔鍾意既其中一項政策,話就話為左保障退休生活,但最大的益係班基金佬,講真供左咁多年,如果可以俾我自己投資,回報一定好過強迫金唔少,不過既然無得揀,唯有希望自己間中轉換下,希望o係唔好之中叫做得無咁差。

經過左十幾年既供款,最近終於達至百幻大關。依家強迫金有一百零一萬左右,賬面賺緊近九萬蚊,而之前亦已經變現左近九萬蚊既盈利,扣除賬面及已變現盈利,大約供左八十萬,自己應該供左廿幾萬,其他就公司供。好老實講,透過轉換投資基金所賺既其實唔算好,比起個人投資真係無得比,而能夠突破百萬,主因係公司供款比一般多,純粹只係供款較多而達成。

現階段大約五成資金擺左o係保守基金,其餘擺o係唔同既股票基金度,新供款繼續保守,大市喪升就再將股票基金續d轉去保守基金鎖定盈利,真係大跌就將保守基金入股票基金,希望o係公司供款較多既先天優勢下能夠繼續持盈保泰,到退休能夠有筆唔錯既金額。