2018年4月20日 星期五

空襲敍利亞

早兩日,美英法三國聲稱敍利亞政府軍曾用化武,於是發動聯合空襲。但要留意,空襲之前,聯合國都未派人去調查事件,而人民所知既,都只係由傳媒所講既得知,但到底傳媒講既係咪真係事實? 大眾根本無從得知。傳媒理應有其操守,不過現實係傳媒都要食飯,唔少傳媒都係受人操控,而今次化武事件,如果真有其事,但係咪一定敍利亞政府軍所為? 還是有人插贓? 未調查又點會知? 但傳媒一面倒稱係敍軍所為,大眾好自然就會認為事實如此。政治從來都係利字當頭,黑過墨汁,今次化武事件到底背後有無陰謀,我地呢d蟻民又點會知,不過咁,三個發動空襲既國家,似乎都過左國力最鼎盛既時期,法國雖然號稱歐盟大國,但同大哥德國已經無得比擬,依家如果同人講去法國旅行,我諗最常聽到既係叫你小心財物,可以想像當地真正既經濟狀況會係點。英國早已唔係以前既日不落帝國,唔好以為重係以前007既光輝時代,脫埋歐前景更加唔明朗。老美貴為世界一哥,英法當然同佢無得比,以往老可以透過軍事力量操控美元政治干預去掠奪其他國家,養成自身既貪婪,依家唔透過掠奪根本解決唔到自身既經濟問題,以前由於佢夠勁,其他國家都耐佢唔何,但唔等於其他國家無不滿,所以先有歐盟既成立,希望能抗衡老美,而近年中國掘起,老美想好似以前咁任意掠奪變得無咁容易。

到底邊個國家o係敍利亞獲益最多,我真係唔知,淨係知道敍利亞受害者,弱國就只有被魚肉,慶幸中國總算有咁上下實力,起碼唔會俾人將自己國土做戰場。

2018年4月12日 星期四

股息收益 @ 2018-03-17

頭先見得閒,登入網上銀行個戶口,見到3月中有6053.4入左落去,原來係上年互助社既股息對比再前一年得8舊幾水,今年有六千蚊算唔錯啦,上年息率3厘,以一個保守既投資,呢個回報叫不俗啦!

2018年4月10日 星期二

不太好的葉氏業績

除左惠記外,龍翔同葉氏都相繼出左業績,由於自己太懶,都未睇惠記同龍翔份業績,不過葉氏總算係自己第一大持股,點都要抽少少時間睇下份業績既,全年純利1.7億,按年增長0.7%,末期息10仙,同上年一樣,計埋中期息0.5仙,以我既買入價約3.09,息率約4厘85,就咁睇都算可以接受既,不過睇完個份全年業績,就真係覺得唔太好,以我既買入價黎計唔算平。

銷售額銷售量多過上年,但股東佔既純利只能持平,做成百億生意,股東佔既利益先得1.7億,毛利率少得可憐,而業績報告亦都有講化工行業既經營環境係挑戰多過機遇,咁低既毛利率亦印證到行業既困難。

現金流方面,經營業務既現金流入重係正數,但少過上年好多,而應收款項同票據就多過上年唔少,雖然話遲下都會收返錢,但都有變成壞賬既可能性,毛利已經少,重要可以“些”數,行業真係幾難做。

四項主業入面,得溶劑業務叫似樣d,主要受惠出口量增加,但年報無講主要出口既地區係邊,雖然中美貿易戰唔一定打得成,而且針對既係較高端既產品,正常應該唔影響溶劑既出口,但最終事態發展成點,真係無人知。而另三項主要都陷入一個困境,毛利率大降,成本上漲,而內地環保要求又嚴謹左,似乎短期內都難有太大改進。

由於自己都儲落唔少貨,現價唔會再入住,2.5樓下先會再考慮。


2018年4月4日 星期三

沽清龍翔

呢輪見個市無乜起色,而龍翔既業績又好似無之前咁好,早兩日決定沽清佢,不過隻野成交量一向唔多,唯有以個較低價以0.97賣埋淨低o固190000股,收返183870.42,賺左23876.31,呢批貨由14年第4季揸到依家,大約3年半,計埋股息有約3成回報,每年只有8%回報多少少。

自買股票以黎,龍翔既回報率唔算最好,只有5成3多d,不過回報額係最好,計埋股息總共賺左近62萬6千,或者有人會覺得揸咁耐先有咁既回報,但自己就覺得都算滿意,黎緊閒置既資金會繼續待機,適時先出手。

2018年3月11日 星期日

不俗的惠記業績

上星期四惠記出左年終業績,未有仔細睇,只知比上年盈利多賺3成6,末期息0.225,比上年多0.06,將會帶黎5萬左右股息。中期息本身都派多左少少,加埋今次末期息,全年股息比上年多近3成3,真係相當不俗,計返自己既買入價,足有十厘,最重點係賺價而唔係賺息蝕價,遲下有心情先再睇下個年終報告。

2018年3月2日 星期五

强迫金轉換 @ 2018-02-21

早幾日又將部份强迫金由中港既股票基金轉去保本度,由佔總數3成8左右,到依家得返2成3多dd,本來之前大跌已經想轉,點知原來無click ok無轉到,最近發現於是轉返,不過錯有錯著,如果果時轉,個價應該會差少少,雖然依家轉都唔算差太遠,但心理上感覺賺左d。

是日交易@2018-02-22/23

呢兩日再減持左部份龍翔

2018-02-22
以1.05賣走100000股龍翔,收返104755.66。

2018-02-23
以1.09賣走10000股龍翔,收返10798.16。

賣賣下,依家得返190000股,話唔定可能會清埋佢。